០១ សីហា ២០១៦
ចាប់ពីថ្ងៃទី៣០ ខែកក្កដា ដល់ថ្ងៃទី១ ខែសីហា ឆ្នាំ២០១៦ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានដឹកនាំគណៈប្រតិភូ ទៅចូលរួមកិច្ចប្រជុំថ្នាក់ទេសាភិបាលនិងកម្មវិធីនានា នៃសន្និសីទ “ប្រទេសបួន គោលដៅតែមួយ” ស្តីពី ការតភ្ជាប់វិស័យទេសចរណ៍និងការពង្រីកសហប្រតិប្រតិបត្តិការក្នុងវិស័យធនាគារ នៅទីក្រុងយ៉ាំងហ្គោន ប្រទេសមីយ៉ានម៉ា ដែលមានការចូលរួមដោយរដ្ឋមន្ត្រីក្រសួងទេសចរណ៍ និងទេសាភិបាលធនាគារកណ្តាលនៃប្រទេសទាំងបួន (CLMV ៈ កម្ពុជា ឡាវ មីយ៉ានម៉ា និងវៀតណាម) ដោយមានការអញ្ជើញចូលរួមជាអធិបតីភាពរបស់ថ្នាក់ឧបនាយករដ្ឋមន្ត្រីនិងអនុប្រធានាធិបតីរបស់ប្រទេស CLMV ។ សន្និសីទនេះ មានគោលបំណងពង្រឹងវិស័យទេសចរណ៍នៅក្នុងចំណោមប្រទេស CLMV ទាក់ទាញវិនិយោគផ្ទាល់បរទេស លើកកម្ពស់ប្រទេស CLMV ជាគោលដៅដ៏ទាក់ទាញតែមួយ និងពង្រីកកិច្ចសហប្រតិបត្តិការនៅក្នុងវិស័យធនាគារ ។
នៅក្នុងវិស័យធនាគារ ទេសាភិបាល ធនាគារកណ្តាលនៃប្រទេសទាំងបួន បានឯកភាពបង្កើនកិច្ចខិតខំប្រឹងប្រែង ដើម្បីសម្រេចបានវឌ្ឍនភាពសំខាន់ៗ ក្រោមក្របខ័ណ្ឌកិច្ចសហប្រតិបត្តិការអាស៊ាន និងបានគាំទ្រការបង្កើត “ក្រុមការងារពង្រឹងកិច្ចសហប្រតិបត្តិការនិងការផ្សាភ្ជាប់ក្នុងវិស័យធនាគារក្នុងចំណោមប្រទេស CLMV” ។ លើសពីនេះ ទេសាភិបាល CLMV ក៏បានឯកភាពពង្រឹងបន្ថែមទៀតលើកិច្ចសហប្រតិបត្តិការនៅក្នុងផ្នែកប្រតិបត្តិការរូបិយវត្ថុ ការត្រួតពិនិត្យធនាគារនិងបទប្បញ្ញាតិ្ត និងសហប្រតិបត្តិការបច្ចេកទេសនានា ។
