២៧ មករា ២០១៥
កាលពីថ្ងៃទី១៤ ខែមករា ឆ្នាំ២០១៥ លោកជំទាវ ជា សិរី អគ្គនាយកបច្ចេកទេសនៃធនាគារជាតិនៃកម្ពុជា បានអញ្ជើញជាកិត្តិយសចូលរួមក្នុងវេទិកាកិច្ចពិភាក្សាអន្តរជាតិរបស់ធនាគារ CIMB ស្តីពី “ផែនទីវិថីអាស៊ាន៖ តើក្រុមហ៊ុនត្រូវរៀបចំយុទ្ធសាស្ត្រថ្មីៗ យ៉ាងដូចម្តេច នៅក្នុងតំបន់អាស៊ីអាគ្នេយ៍” នៅទីក្រុងកូឡាឡាំពួរ ប្រទេសម៉ាឡេស៊ី ។
វេទិកានេះរៀបចំឡើងក្នុងគោលបំណងដើម្បីផ្សព្វផ្សាយពីរបាយកាណ៍របស់សេដ្ឋវិទូនៃធនាគារ CIMB និងការបង្កើតបណ្តុំព័ត៌មានស្តីពី “ការយល់ដឹងអំពីអាស៊ាន” លើគេហទំព័រ ។ របាយការណ៍និងព័ត៌មានទាំងនេះ បង្ហាញពីលទ្ធផលនៃការស្ទង់មតិលើវិធីសាស្ត្រដែលក្រុមហ៊ុនត្រៀមខ្លួនសម្រាប់ការធ្វើសមាហរណកម្ម និងសេរីភាវូបនីយកម្មសេដ្ឋកិច្ចនៅក្នុងតំបន់អាស៊ីអាគ្នេយ៍ និងទស្សនៈរបស់វាគ្មិននិងភ្ញៀវកិត្តិយសទាក់ទងនឹងសហគមន៍សេដ្ឋកិច្ចអាស៊ាន ។
