២៨ កក្កដា ២០១៦
រាជធានីភ្នំពេញ ព្រះរាជាណាចក្រកម្ពុជា ថ្ងៃទី២៨ ខែកក្កដា ឆ្នាំ២០១៦ ធនាគារជាតិនៃកម្ពុជា សហការជាមួយវិទ្យាស្ថានជាតិស្ថិតិ នៃក្រសួងផែនការ បានរៀបចំពិធីប្រកាសផ្សព្វផ្សាយ លទ្ធផលអង្កេតវិនិយោគផ្ទាល់បរទេស ឆ្នាំ២០១៤ នៅសណ្ឋាគារកាំបូឌីយ៉ាណា ។ ធនាគារជាតិនៃកម្ពុជា បានចុះហត្ថ-លេខាជាផ្លូវការជាមួយវិទ្យាស្ថានជាតិស្ថិតិ នៃក្រសួងផែនការ លើកិច្ចព្រមព្រៀង ស្តីពី ការអង្កេតវិនិយោគផ្ទាល់បរទេស ឆ្នាំ២០១៤ កាលពីថ្ងៃទី០២ ខែមិថុនា ឆ្នាំ២០១៥ ។ ការចុះអង្កេតតាមក្រុមហ៊ុន រោងចក្រ សហគ្រាស បានចាប់ផ្តើមធ្វើឡើងក្នុងអំឡុងពេលពីខែកញ្ញា ឆ្នាំ២០១៥ រហូតដល់ ខែមករា ឆ្នាំ២០១៦ ។ ការអង្កេតនេះ មានសំណាកគំរូ ១២៤ ក្រុមហ៊ុន រោងចក្រ សហគ្រាស គ្របដណ្តប់លើវិស័យវិនិយោគផ្ទាល់បរទេសនៅកម្ពុជា ។
ពិធីប្រកាសផ្សព្វផ្សាយនេះ ត្រូវបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា ព្រមទាំងមានការចូលរួមពីតំណាងក្រសួង-ស្ថាប័នពាក់ព័ន្ធនានារបស់រាជរដ្ឋាភិបាល វិស័យឯកជន មន្ត្រីធនាគារជាតិនៃកម្ពុជា មន្រ្តីវិទ្យាស្ថានជាតិស្ថិតិនៃក្រសួងផែនការ ព្រមទាំងស្ថាប័នអន្តរជាតិ ដៃគូអភិវឌ្ឍន៍ សភាពាណិជ្ជកកម្ម អ្នកស្រាវជ្រាវ ផងដែរ ។
លទ្ធផលអង្កេតវិនិយោគផ្ទាល់បរទេសមានសារៈសំខាន់ណាស់ ចំពោះធនាគារជាតិនៃកម្ពុជា ក៏ដូចជាប្រទេសកម្ពុជាទាំងមូល ផងដែរ ។ លទ្ធផលនេះ ត្រូវបានប្រើប្រាស់សម្រាប់ចងក្រងស្ថិតិជញ្ជីងទូទាត់ និងស្ថានភាពវិនិយោគអន្តរជាតិរបស់កម្ពុជា និងជាធាតុចូលដ៏សំខាន់មួយក្នុងការកំណត់នូវគោលនយោបាយសេដ្ឋកិច្ច ការរៀបចំផែនការអភិវឌ្ឍន៍យុទ្ធសាស្រ្ត និងការសិក្សាស្រាវជ្រាវពាក់ព័ន្ធនឹងបញ្ហាសាកលភាវូប-នីយកម្ម ។ លើសពីនេះ ការធ្វើអង្កេតនេះបានផ្តល់នូវឱកាសដ៏ល្អដល់មន្រ្តីជំនាញរបស់ធនាគារជាតិនៃកម្ពុជា និងមន្ត្រីជំនាញរបស់វិទ្យាស្ថានជាតិស្ថិតិ ដើម្បីកសាងសមត្ថភាពធនធានមនុស្ស និងផ្តល់នូវកិច្ចសហប្រតិ-បត្តិការការយ៉ាងជិតស្និទ្ធិ និងផ្លាស់ប្តូរបទពិសោធន៍ជាក់ស្តែង និងចែករំលែកចំណេះដឹងគ្នាវិញទៅមក ។
មានបទបង្ហាញចំនួនពីរដែលត្រូវបានធ្វើឡើងក្នុងពិធីប្រកាសផ្សព្វផ្សាយនេះ (១) បទបង្ហាញស្តីពី ដំណើរការ និងវិធីសាស្ត្រអង្កេត ដោយផ្តោតសំខាន់ទៅលើ វិធីសាស្រ្តការជ្រើសរើស និងកំណត់សំណាកគំរូអង្កេត ការរៀបចំលិខិតរដ្ឋបាលផ្សេងៗពាក់ព័ន្ធនឹងការអង្កេត និងអំពីបញ្ហាប្រឈមក្នុងការធ្វើអង្កេតនេះ ដោយតំណាងពីវិទ្យាស្ថានជាតិស្ថិតិ នៃក្រសួងផែនការ និង (២) បទបង្ហាញស្តីអំពី របកគំហើញនៃការធ្វើអង្កេតវិនិយោគផ្ទាល់បរទេស ឆ្នាំ២០១៤ ដោយផ្តោតជាពិសេសទៅលើលទ្ធផលដែលទទួលបានពីការអង្កេត និងការធ្វើការប៉ាន់ស្មានបំពេញបន្ថែម ដើម្បីធ្វើការកែតម្រូវបកក្រោយនូវទិន្នន័យវិនិយោគផ្ទាល់បរទេសដែលបានចេញផ្សាយកន្លងមករហូតដល់ឆ្នាំ២០១០ ដោយតំណាងពីធនាគារជាតិនៃកម្ពុជា ។
