សេចក្តីប្រកាសព័ត៌មាន
ឯកឧត្តម​ ជា​ ចាន់​តូ​ ទេសាភិបាល​ នៃ​ធនាគារជាតិ​នៃ​កម្ពុជា​ បាន​អនុញ្ញាត​ឱ្យ​គណៈប្រតិភូ​ការិយាល័យ​ស្រាវជ្រាវ​ម៉ាក្រូសេដ្ឋកិច្ច​អាស៊ាន​+៣​ (AMRO)​ ចូល​ជួប​សម្តែង​ការ​គួរសម​និង​ពិភាក្សា​ការងារ​នៅ​ក្នុង​ដំណើរ​ទស្សនកិច្ច​ប្រចាំឆ្នាំ​របស់​ AMRO​ មក​កម្ពុជា​
២៦ សីហា ២០១៦

រាជធានីភ្នំពេញ , ថ្ងៃទី២៦ ខែសីហា ឆ្នាំ ២០១៦

ទំនាក់ទំនង
ផ្នែកទំនាក់ទំនង
ទូរសព្ទ :  (៨៥៥) ០២៣ ៩៩០ ១៩៦
អ៊ីម៉ែល : nbccommunication@nbc.org.kh
 

សេចក្តីប្រកាសព័ត៌មាន
 

កាលពី​ព្រឹក​ថ្ងៃ​ទី​២៦​ ខែសីហា​ ឆ្នាំ​២០១៦​ ឯកឧត្តម​ ជា​ ចាន់​តូ​ ទេសាភិបាល​ នៃ​ធនាគារជាតិ​នៃ​កម្ពុជា​ បាន​អនុញ្ញាត​ឱ្យ​គណៈប្រតិភូ​ការិយាល័យ​ស្រាវជ្រាវ​ម៉ាក្រូសេដ្ឋកិច្ច​អាស៊ាន​+៣​ (AMRO)​ ដឹកនាំ​ដោយ​ លោកស្រី​ បណ្ឌិត​ Junhong​ Chang​ ជា​ប្រធាន​ AMRO​ ចូល​ជួប​សម្តែង​ការ​គួរសម​និង​ពិភាក្សា​ការងារ​នៅ​ក្នុង​ដំណើរ​ទស្សនកិច្ច​ប្រចាំឆ្នាំ​របស់​ AMRO​ មក​កម្ពុជា​ ចាប់ពី​ថ្ងៃ​ទី​២២​ ដល់​ ២៦​ ខែសីហា​ ឆ្នាំ​២០១៦​ ។​

​ទស្សនកិច្ច​ប្រចាំឆ្នាំ​នេះ​ មាន​គោលបំណង​ជួប​ពិភាក្សា​ជាមួយ​ក្រសួង​ស្ថាប័ន​ពាក់ព័ន្ធ​របស់​ រាជរដ្ឋាភិបាល​ និង​វិស័យ​ឯកជន​នានា​ ដើម្បី​ធ្វើការ​វាយតម្លៃ​ឱ្យ​បាន​គ្រប់​ជ្រុងជ្រោយ​លើ​វឌ្ឍនភាព​សេដ្ឋកិច្ច​កម្ពុជា​ក្នុង​ឆ្នាំ​២០១៦​ និង​ទស្សនវិស័យ​នា​រយៈពេល​មធ្យម​ខាង​មុខ​ ។​ ក្នុង​ឱកាស​នោះ​ ឯកឧត្តម​ ទេសាភិបាល​ធនាគារជាតិ​នៃ​កម្ពុជា​ បាន​ជម្រាប​ជូន​ក្រុម​បេសកកម្ម​ពី​ការ​រីក​ចម្រើន​សេដ្ឋកិច្ច​និង​វិស័យ​ធនាគារ​ដែល​កន្លង​មក​បន្ត​សម្រេច​បាន​ល្អ​ប្រសើរ​ ។​ វិស័យ​ធនាគារ​បាន​រួមចំណែក​ក្នុង​ការ​គាំទ្រ​និង​ជំរុញ​ កំណើន​សេដ្ឋកិច្ចជាតិ​ និង​កាត់​បន្ថយ​ភាព​ក្រីក្រ​របស់​ប្រជាជន​កម្ពុជា​ជាមួយនឹង​ការ​រីក​ចម្រើន​យ៉ាង​ឆាប់រហ័ស​ វិស័យ​ធនាគារ​ក៏​ប្រឈម​នឹង​ហានិភ័យ​ផង​ដែរ​ ។​ ធនាគារជាតិ​នៃ​កម្ពុជា​បាន​ពង្រឹង​ការ​ត្រួតពិនិត្យ​និង​បទ​ប្ប​ញ្ញ​តិ្ត​ ព្រមទាំង​ដាក់​ចេញ​នូវ​វិធានការ​មីក្រូ​និង​ម៉ា​ក្រូ​ប្រុង​ប្រយ័ត្ន​នានា​ ស្រប​តា​មកា​រវិ​វ​ឌ្ឍ​នៃ​ស្ថានភាព​ទីផ្សារ​និង​ស្តង់ដា​អន្តរជាតិ​ ។​ ទន្ទឹម​នេះ​ ធនាគារជាតិ​នៃ​កម្ពុជា​រក្សា​បាន​ស្ថិរភាព​អត្រា​ប្ដូរ​ប្រាក់​ និង​ស្ថិរភាព​ថ្លៃ​យ៉ាង​ល្អ​ប្រសើរ​ ដែល​រួមចំណែក​ក្នុង​ការ​រក្សា​ស្ថិរភាព​ម៉ាក្រូសេដ្ឋកិច្ច​ប្រកបដោយ​ភាពរឹងមាំ​ ។​

​លោកស្រី​ បណ្ឌិត​ Junhong​ Chang​ បាន​សម្តែង​សុទិដ្ឋិនិយម​ចំពោះ​ស្ថានភាព​ម៉ាក្រូសេដ្ឋកិច្ច​កម្ពុជា​ និង​បាន​បង្ហាញ​ពី​ការ​វាយតម្លៃ​លើ​សេដ្ឋកិច្ច​កម្ពុជា​ថា​មាន​កំណើន​ប្រមាណ​ ៦,៨%​ នៅ​ឆ្នាំ​២០១៦​ ជាមួយ​ អត្រា​អតិផរណា​ទាប​ប្រមាណ​ ៣%​ ។​ លោកស្រី​ បាន​អបអរសាទរ​ចំពោះ​ការ​ដាក់​ចេញ​នូវ​វិធានការ​ថ្មីៗ​របស់​ធនាគារជាតិ​នៃ​កម្ពុជា​ក្នុង​ការ​ធានា​បាន​នូវ​ស្ថិរភាព​វិស័យ​ធនាគារ​ និង​បាន​ផ្តល់​អនុសាសន៍​មួយ​ចំនួន​ សម្រាប់​អនុវត្ត​នា​ពេល​ខាង​មុខ​ ។​ ភាគច្រើន​នៃ​អនុសាសន៍​នេះ​ ធនាគារជាតិ​នៃ​កម្ពុជា​បាន​និង​កំពុង​រៀបចំ​ និង​គ្រោង​ដាក់​ឱ្យ​អនុវត្ត​ ជា​ពិសេស​ចំពោះ​វិធានការ​ម៉ា​ក្រូ​ប្រុង​ប្រយ័ត្ន​ចាំបាច់​នានា​ ដែល​នឹង​ជួយ​គ្រប់គ្រង​ ហានិភ័យ​ក្នុង​ប្រព័ន្ធ​ធនាគារ​ឱ្យ​កាន់តែ​មាន​ប្រសិទ្ធភាព​ ។​

​ឯកឧត្តម​ ទេសាភិបាល​ ក៏​បាន​ថ្លែងអំណរគុណ​ចំពោះ​ការិយាល័យ​ AMRO​ ដែល​បាន​បន្ត​ជួយ​វាយតម្លៃ​លើ​ស្ថានភាព​សេដ្ឋកិច្ច​និង​វិស័យ​ហិរញ្ញវត្ថុ​កម្ពុជា​ប្រចាំឆ្នាំ​២០១៦​ នេះ​ ជា​ពិសេស​បាន​ផ្តល់​នូវ​អនុសាសន៍​ចម្បងៗ​ដើម្បី​ឱ្យ​កម្ពុជា​ធានា​បានការ​អភិវឌ្ឍ​សេដ្ឋកិច្ច​ប្រកបដោយ​ចីរភាព​ និង​បាន​ថ្លែងអំណរគុណ​ AMRO​ ដែល​ផ្តល់​ឱកាស​ឱ្យ​មន្ត្រី​ធនាគារជាតិ​ធ្វើ​ជា​ Secondee​ នៅ​ AMRO​ ដើម្បី​កសាង​សមត្ថភាព​ជំនាញ​ ។​ ឯកឧត្តម​ ក៏​បាន​ស្នើ​ការិយាល័យ​ AMRO​ ឱ្យ​បន្ត​ជួយ​រួមចំណែក​ក្នុង​ការ​ពង្រឹងសមត្ថភាព​មន្ត្រី​ធនាគារជាតិ​នៃ​កម្ពុជា​បន្ថែម​ទៀត​ ។​



ចុចត្រង់នេះទាញយកឯកសារ