២០ មករា ២០១៦
នៅថ្ងៃទី២០ ខែមករា ឆ្នាំ២០១៦ ធនាគារជាតិនៃកម្ពុជានិងធនាគារកណ្តាលមីយ៉ាន់ម៉ាបានចុះហត្ថលេខាលើអនុស្សរណៈយោគយល់ ដើម្បីពង្រឹងកិច្ចសហប្រតិបត្តិការរវាងធនាគារកណ្តាលទាំងពីរ ។
ក្នុងបរិការណ៍សកលភាវូបនីយកម្មនៃទីផ្សារហិរញ្ញវត្ថុបច្ចុប្បន្នបានកើនឡើងឥតឈប់ឈរ ការចុះហត្ថលេខានេះ ត្រូវបានធ្វើឡើងក្នុងគោលបំណងពង្រឹងកិច្ចសហប្រតិបត្តិការរវាងអាជ្ញាធររូបិយវត្ថុទាំងពីរ ដើម្បីលើកកម្ពស់ការអភិវឌ្ឍនូវវិស័យហិរញ្ញវត្ថុនិងធនាគារកម្ពុជា ក៏ដូចសាធារណរដ្ឋសហភាពមីយ៉ាន់ម៉ា។
តាមរយៈអនុស្សរណៈយោគយល់នេះ ស្ថាប័នទាំងពីរមានគោលបំណងបង្កើតជាយន្តការនៃកិច្ចសហប្រតិបត្តិការ សំដៅគាំទ្រដល់ការអភិវឌ្ឍវិស័យធនាគារនិងហិរញ្ញវត្ថុរបស់កម្ពុជា និងសាធារណរដ្ឋសហភាពមីយ៉ាន់ម៉ា តាមរយៈ ៖
• ការផ្លាស់ប្តូរគណៈប្រតិភូដើម្បីបំពេញទស្សនកិច្ច និងចែករំលែកបទពិសោធន៍ពីគ្នាទៅវិញទៅមក ដោយរៀបចំជាសិក្ខាសាលា និងទស្សនកិច្ចសិក្សាជាទៀងទាត់ក្នុងប្រទេសទាំងពីរ
• ការផ្លាស់ប្តូរព័ត៌មាន និងបទពិសោធន៍នានាទាក់ទងនឹងការអនុវត្តគោលនយោបាយរូបិយវត្ថុ ការគ្រប់គ្រងអត្រាប្តូរប្រាក់ ប្រព័ន្ធទូទាត់ បទប្បញ្ញត្តិនិងការត្រួតពិនិត្យធនាគារពាណិជ្ជនិងការគ្រប់គ្រងធនាគារកណ្តាល និង
• ការគាំទ្រដល់ធនាគារពាណិជ្ជក្នុងការបើកការិយាល័យតំណាង និង ឫ សាខា ដោយអនុលោមតាមច្បាប់និងបទប្បញ្ញត្តិពាក់ព័ន្ធក្នុងប្រទេសរៀងខ្លួន ដើម្បីសម្រួលដល់ការទូទាត់ផ្នែកពាណិជ្ជកម្ម និងវិនិយោគរវាងប្រទេសទាំងពីរ ។
ការចុះអនុស្សរណៈនេះនឹងផ្តល់ឱកាសបន្ថែមទៀតដល់ស្ថាប័នទាំងពីរក្នុងការបន្តចែករំលែកបទពិសោធន៍ ក៏ដូចជារឹងចំណងមិត្តភាព ព្រមទាំងពង្រឹងកិច្ចសហប្រតិបត្តិការទ្វេភាគីឱ្យកាន់តែជិតស្និទ្ធ ដើម្បីបន្តពង្រឹងស្ថិរភាពប្រព័ន្ធធនាគារសំដៅគាំទ្រដល់ស្ថិរភាពហិរញ្ញវត្ថុនិងម៉ាក្រូសេដ្ឋកិច្ច ។
