០៦ មករា ២០១៦
កាលពីព្រឹកថ្ងៃទី៦ ខែមករា ឆ្នាំ២០១៦ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានអនុញ្ញាតឱ្យ ឯកឧត្តម Vladimir Tomsik ទេសាភិបាលរងធនាគារកណ្តាលសាធារណរដ្ឋឆែក ចូលជួបសម្តែងការគួរសម និងពិភាក្សាការងារក្នុងឱកាសបំពេញទស្សនកិច្ចនៅកម្ពុជា ពីថ្ងៃទី៥-១០ ខែមករា ឆ្នាំ២០១៦ ។ បន្ទាប់ពីការសម្ដែងការគួរសម ឯកឧត្តម Vladimir Tomsik ក៏បានធ្វើបទបង្ហាញលើប្រធានបទ៖ ១/-ការអភិវឌ្ឍម៉ាក្រូសេដ្ឋកិច្ចនៅសាធារណរដ្ឋឆែក និងតំបន់អឺរ៉ូ និង២/- តួនាទី ប្រព័ន្ធហិរញ្ញវត្ថុនៅក្នុងទីផ្សារកំពុងងើបឡើង ពិសោធន៍នៃការអភិវឌ្ឍប្រព័ន្ធហិរញ្ញវត្ថុសាធារណរដ្ឋឆែក ដើម្បីចែករំលែកបទពិសោធន៍ ជូនដល់មន្ត្រីជំនាញរបស់ធនាគារជាតិនៃកម្ពុជា ។ ទស្សនកិច្ចនេះគឺជាលើកទី១ហើយ ដែលថ្នាក់ដឹកនាំជាន់ខ្ពស់របស់ធនាគារកណ្ដាលសាធារណរដ្ឋឆែកអញ្ជើញមកបំពេញទស្សនកិច្ចនៅធនាគារជាតិនៃកម្ពុជា ក្រោយពីការពង្រឹងកិច្ចសហប្រតិបត្តិការរវាងធនាគារកណ្ដាលទាំងពីរចាប់ពីឆ្នាំ២០១១ មក ។ គួរបញ្ជាក់ថា តាមរយៈកិច្ចសហប្រតិបត្តិការល្អរវាងធនាគារកណ្ដាលទាំងពីរ ធនាគារកណ្ដាលសាធារណរដ្ឋឆែកបានចូលរួមចំណែកអភិវឌ្ឍធនធានមនុស្សរបស់ធនាគារជាតិនៃកម្ពុជា ក្រោមរូបភាពជាការអញ្ជើញមន្ត្រីជំនាញឱ្យទៅចូលរួមក្នុងវគ្គបណ្ដុះបណ្ដាលនានា ដែលរៀបចំដោយធនាគារកណ្ដាលសាធារណរដ្ឋឆែក និងពង្រឹងទំនាក់ទំនងរវាងធនាគារកណ្តាលទាំងពីរឱ្យកាន់តែរឹងមាំថែមទៀត ។
