០៤ តុលា ២០១៦
ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានដឹកនាំគណៈប្រតិភូ ទៅចូលរួមក្នុងមហាសន្និបាតពេញអង្គប្រចាំឆ្នាំ២០១៦ របស់មូលនិធិរូបិយវត្ថុអន្តរជាតិ និងធនាគារពិភពលោក នៅរដ្ឋធានីវ៉ាស៊ីនតោន សហរដ្ឋអាមេរិក នាថ្ងៃទី៤-៩ ខែតុលា ឆ្នាំ២០១៦ ។ មហាសន្និបាត ត្រូវបានប្រារព្ធឡើង អមដោយសិក្ខាសាលាលើប្រធានបទសំខាន់ៗ ដែលពាក់ព័ន្ធនឹងការអភិវឌ្ឍក្នុងវិស័យសេដ្ឋកិច្ចនិងហិរញ្ញវត្ថុពិភពលោកនិងតំបន់ ការរីកចម្រើនផ្នែកបច្ចេកវិទ្យា វិសមភាពចំណូល គោលនយោបាយសារពើពន្ធ រូបិយវត្ថុនិងហិរញ្ញវត្ថុ និងបញ្ហាប្រឈមចម្បងៗ ដែលពិភពលោកកំពុងជួបប្រទះ ។
ឯកឧត្តម ជា ចាន់តូ និងគណៈប្រតិភូ ក៏បានចូលរួមកិច្ចប្រជុំថ្នាក់ទេសាភិបាលនិងរដ្ឋមន្ត្រីហិរញ្ញវត្ថុ នៃការិយាល័យអាស៊ីអាគ្នេយ៍ (SEAV Group) ដើម្បីជួបពិភាក្សា ផ្លាស់ប្តូរយោបល់ពីស្ថានភាពពិភពលោក បញ្ហាប្រឈមក្នុងតំបន់ និងគោលនយោបាយនានា ដែលប្រទេសជាសមាជិក SEAV Group គួរអនុវត្ត សម្រាប់គាំទ្រការអភិវឌ្ឍសេដ្ឋកិច្ចនិងរក្សាស្ថិរភាពហិរញ្ញវត្ថុ ។
ក្រៅពីការចូលរួមក្នុងកិច្ចប្រជុំខាងលើ គណៈប្រតិភូធនាគារជាតិនៃកម្ពុជាបានជួបជាមួយនាយកដ្ឋាននានារបស់មូលនិធិរូបិយវត្ថុអន្តរជាតិ ដែលទទួលបន្ទុកការងារកម្ពុជា រួមមាន នាយកដ្ឋានអាស៊ី-ប៉ាស៊ីហ្វិក និងនាយកដ្ឋានទីផ្សារទុន ដើម្បីជម្រាបជូនពីការអភិវឌ្ឍរីកចម្រើនរបស់វិស័យសេដ្ឋកិច្ចនិងធនាគារកម្ពុជា បញ្ហាប្រឈម និងតម្រូវការជំនួយបច្ចេកទេសពីមូលនិធិរូបិយវត្ថុអន្តរជាតិ ។ ជារួម មូលនិធិរូបិយវត្ថុអន្តរជាតិបានវាយតម្លៃខ្ពស់ចំពោះវឌ្ឍនភាពសេដ្ឋកិច្ចកម្ពុជា និងការរីកចម្រើនវិស័យធនាគារ និងបានបង្ហាញការគាំទ្រដល់កម្ពុជា តាមរយៈការបន្តផ្តល់ជំនួយបច្ចេកទេសអភិវឌ្ឍធនធានមនុស្ស និងជួយតាមដានស្ថានភាពម៉ាក្រូសេដ្ឋកិច្ចកម្ពុជា ។
