២៥ វិចិ្ឆកា ២០១៩
នាព្រឹកថ្ងៃច័ន្ទ១៤រោច ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៥ ខែវិច្ឆិកា ឆ្នាំ២០១៩ ឯកឧត្តម ជា ចាន់តូ អគ្គទេសាភិបាល ធនាគារជាតិនៃកម្ពុជា បានចូលរួមជាគណអធិបតី នៅក្នុងសន្និសីទធនាគារអាស៊ានលើកទី២២ និងកិច្ចប្រជុំក្រុមប្រឹក្សាភិបាលសមាគមធនាគារអាស៊ានលើកទី៤៩ នៅសណ្ឋាគារសុខា ភ្នំពេញ។ សន្និសីទនេះមានការចូលរួមពីអគ្គលេខាធិការដ្ឋានអាស៊ាន ថ្នាក់ដឹកនាំក្រសួង-ស្ថាប័ន តំណាងស្ថានទូតបណ្តាប្រទេសអាស៊ានប្រចាំនៅកម្ពុជា និងសមាជិកសមាគមធនាគារអាស៊ាន សរុបប្រមាណជាង៥០០នាក់ ។ សន្និសីទនេះត្រូវបានរៀបចំឡើងក្រោមទស្សនទាន “ការតភ្ជាប់អាស៊ានឆ្នាំ២០២៥: ពិភពលោកដ៏ក្លៀវក្លា ថ្មីមួយនៃការច្នៃប្រឌិតបច្ចេកវិទ្យា សម្រាប់វិស័យធនាគារអាស៊ានតែមួយ” ក្នុងគោលបំណង ពិភាក្សាលើការធ្វើកំណែទម្រង់ប្រព័ន្ធឌីជីថលសម្រាប់សេវាធនាគារ និងហិរញ្ញវត្ថុក្នុងតំបន់ សំដៅជំរុញការធ្វើទំនើបកម្មហេដ្ឋារចនាសម្ព័ន្ធហិរញ្ញវត្ថុ និងបច្ចេកវិទ្យា ដើម្បីបង្កើនប្រសិទ្ធភាពនៃការផ្តល់សេវាហិរញ្ញវត្ថុ។
