០៩ កុម្ភៈ ២០១៥
កាលពីថ្ងៃទី ៩-១០ ខែកុម្ភៈ ឆ្នាំ២០១៥ នេះ ធនាគារជាតិនៃកម្ពុជា បានប្រារព្ធពិធីសន្និបាតបូកសរុបលទ្ធផលការងារប្រចាំឆ្នាំ២០១៤ និងទិសដៅការងារឆ្នាំ ២០១៥ របស់ធនាគារជាតិនៃកម្ពុជាក្រោមអធិបតីភាព ដ៏ខ្ពង់ខ្ពស់របស់ ឯកឧត្តម ជា ចាន់តូ អគ្គទេសាភិបាលធនាគារជាតិនៃកម្ពុជា ។
នៅក្នុងឆ្នាំ២០១៤ នេះ ធនាគារជាតិនៃកម្ពុជាបានបន្តអនុវត្តគោលនយោបាយរូបិយវត្ថុនិងប្តូរប្រាក់ ប្រកបដោយភាពប្រុងប្រយ័ត្ន និងទន់ភ្លន់ ហើយបានរក្សានូវស្ថិរភាពថ្លៃ និងអត្រាប្តូរប្រាក់ ដែលចូលរួមចំណែក រក្សាស្ថិរភាពម៉ាក្រូសេដ្ឋកិច្ចនៅកម្ពុជាបានយ៉ាងល្អប្រសើរ ។ ជាក់ស្តែង អត្រាអតិផរណាប្រចាំខែធ្នូ ឆ្នាំ២០១៤ មានកម្រិតត្រឹម ១,១% ដែលជាអត្រាមួយទាបបំផុតក្នុងតំបន់ ហើយអត្រាប្តូរប្រាក់រៀលធៀបនឹងដុល្លារអាមេរិក មានស្ថិរភាពក្នុងរង្វង់ ៤០៤០ រៀលក្នុងមួយដុល្លារអាមេរិក ។
ទន្ទឹមនេះ ប្រព័ន្ធធនាគារបន្តអភិវឌ្ឍ មានស្ថិរភាពរឹងមាំ ភាពប្រកួតប្រជែង និងសមាហរណកម្មខ្ពស់ ទៅក្នុងតំបន់និងពិភពលោក ស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០១១-២០២០ ។ ភាពស៊ីជម្រៅ ផ្នែកហិរញ្ញវត្ថុ (M2/GDP) បានកើនឡើងដល់ប្រមាណ ៦៣% ទ្រព្យសកម្មវិស័យធនាគារ និងហិរញ្ញវត្ថុបាន កើនឡើងដល់ ១១២% នៃផ.ស.ស (១៨,៦ពាន់លានដុល្លារ) ប្រាក់បញ្ញើនិងឥណទាន បានកើនឡើងដល់ ៦៤% នៃផ.ស.ស (១០,៦ពាន់លានដុល្លារ) និង ៦៨% នៃផ.ស.ស (១១,៤ពាន់លានដុល្លារ) ។ ក្នុងនោះ ទ្រព្យសកម្មរបស់វិស័យធនាគារមានកំណើន ២៨% ស្របពេលដែលប្រាក់បញ្ញើ និងឥណទានបានកើនឡើង ៣១% និង ៣១% រៀងគ្នា ។ ម្យ៉ាងទៀត វិស័យមីក្រូហិរញ្ញវត្ថុត្រូវបានទទួលស្គាល់ជាអន្តរជាតិថា បានរួម ចំណែកយ៉ាងសកម្មក្នុងការគាំទ្រកំណើនសេដ្ឋកិច្ច និងកាត់បន្ថយភាពក្រីក្រនៅកម្ពុជា ។
លើសពីនេះ គ្រឹះសា្ថនធនាគារនិងមីក្រូហិរញ្ញវត្ថុបានពង្រីកបណ្តាញសាខានៅទូទាំងប្រទេសរហូត ដល់ទីជនបទ ដែលបានបម្រើសេវាហិរញ្ញវត្ថុដល់អតិថិជនកាន់តែច្រើន ។ ចំនួនប្រជាជនដែលទទួលបាន សេវាហិរញ្ញវត្ថុធៀបនឹងចំនួនប្រជាជនពេញវ័យសរុប បានកើនដល់ ៤២% នៅឆ្នាំ២០១៤ បើធៀបនឹង ១៩% នៅឆ្នាំ២០០០ ។
ចំពោះកិច្ចសហប្រតិបត្តិការអន្តរជាតិ ធនាគារជាតិនៃកម្ពុជាបានបន្តពង្រឹងនិងពង្រីកជាប់ជាប្រចាំនូវ កិច្ចសហប្រតិបត្តិការទ្វេភាគីនិងពហុភាគីជាមួយធនាគារកណ្តាល ស្ថាប័នហិរញ្ញវត្ថុ និងវិទ្យាស្ថានបណ្តុះបណ្តាល ទាំងក្នុងតំបន់និងអន្តរជាតិ ដើម្បីផ្លាស់ប្តូរព័ត៌មាននិងបទពិសោធន៍ ព្រមទាំងបង្កើនកិច្ចសហប្រតិបត្តិការទៅ លើវិស័យជំនាញនានា ។ ម្យ៉ាងទៀត ធនាគារជាតិនៃកម្ពុជាបានគាំទ្រនិងរួមចំណែកក្នុងគំនិតផ្តួចផ្តើមនានា សំដៅសម្រេចឱ្យបាននូវការបង្កើតសហគមន៍សេដ្ឋកិច្ចអាស៊ាននាចុងឆ្នាំ២០១៥ ខាងមុខ និងបានរួមចំណែក បង្កើត និងអភិវឌ្ឍប្រព័ន្ធសុវត្ថិភាពហិរញ្ញវត្ថុក្នុងតំបន់ ទាំងក្របខ័ណ្ឌអាស៊ាននិងអាស៊ាន+៣ ។
